አክሲዮስ፡ የፔንታጎን ኃይሎች ኢራንን ለማጥቃት እንዲዘጋጁ ታዘዋል አለ

አክሲዮስ የተሰኘው የአሜሪካ መገናኛ ብዙኃን፣ ፕሬዝዳንት ዶናልድ ትራምፕ በኢራን ላይ ሰፊ ወታደራዊ እርምጃ ለመውሰድ የመጨረሻ ውሳኔ አልወሰዱም ሲል፣ የፔንታጎን ኃይሎች ግን ጥቃት ለመፈጸም ዝግጁ እንዲሆኑ ታዘዋል ብሎ ዘግቧል። ዘገባው ስማቸው ያልተገለጸ የአሜሪካና የእስራኤል ኃላፊዎችን ጠቅሷል።

እንደ ዘገባው፣ ጥቃቱ ኅዳር 3 ቀን ከሚካሄደው የአሜሪካ የመካከለኛ ዘመን ምርጫና አንድ ሳምንት ያህል ቀደም ብሎ እንደሚካሄድ የሚጠበቀው የእስራኤል ምርጫ በፊት ሊፈጸም ይችላል። የትራምፕ የሀገር ደኅንነት ቡድን በካምፕ ዴቪድ ስለጦርነቱና ስለወደፊቱ ስትራቴጂ ሰፊ ውይይት አድርጓል ተብሏል።

ዘገባው፣ ዘመቻው ከተጀመረ በኢራን የኤሌክትሪክ ማመንጫዎች፣ የልማት መሠረተ ልማትና የኒውክሌር ተቋማት ላይ በስፋት ዒላማ እንደሚያደርግ ገልጿል።

የእስራኤል ኃላፊዎች፣ አሜሪካና እስራኤል በጥቃቱ በጋራ ሊሠሩ ይችላሉ ብለዋል፤ ኢራን በመቶዎች የሚቆጠሩ ባለስቲክ ሚሳይሎችን በእስራኤል ላይ በመተኮስ የአጸፋ እርምጃ ልትወስድ ትችላለች የሚል ስጋታቸውንም ቀድመው ገልጸዋል።

በቀጠር አሸማጋይነት በዋሽንግተንና በቴህራን መካከል የሚደረገው ዲፕሎማሲያዊ ውይይት ምንም እንቅስቃሴ አላመጣም። ቀጠር በአዲሱ የአሜሪካ የኒውክሌር ቅድመ ሁኔታ ላይ የኢራንን መልስ እየጠበቀች ነው ተብሏል።

ትራምፕ፣ አሜሪካ በሆርሙዝ ወሽመጥ ላይ “የብረት አጥር” ያሉትን ገደቦች አስቀምጣለች፣ የውኃ መተላለፊያውም ሙሉ በሙሉ በአሜሪካ የባሕር ኃይል ቁጥጥር ሥር ነው ብለዋል። የኢራን ወታደራዊ አቅም እጅግ ተዳክሟል፣ ማንኛውም ጦርነት በጣም በፍጥነት ይጠናቀቃል፣ የነዳጅ ዋጋም በከፍተኛ ሁኔታ ይወርዳል ሲሉ ተናግረዋል። የዋይት ሃውስ ኃላፊዎች፣ ሁሉም አማራጮች ክፍት ናቸው ብለዋል፤ የኢራን ኢኮኖሚ እየፈረሰ ነው ይላሉ።

በተያያዘ ዜና፣ የአሜሪካ ማዕከላዊ ዕዝ (ሴንትኮም) አንድ የአሜሪካ አየር ኃይል ኤፍ-16 በመካከለኛው ምሥራቅ በዘመቻ ላይ ሆኖ ከኬሲ-135 ነዳጅ አቅራቢ አውሮፕላን በአየር ላይ ነዳጅ ሲሞላ የሚያሳዩ ምስሎችን አውጥቷል። በአየር ላይ ነዳጅ መሙላት፣ የውጊያ አውሮፕላኖች ረጅም ርቀት እንዲጓዙና ሳያርፉ ለረጅም ሰዓታት በአየር ላይ እንዲቆዩ ያስችላል።

ተንታኞች፣ የአሜሪካ ኃይሎች በአካባቢው ዝግጁነታቸውን በጨመሩበትና የሆርሙዝ ወሽመጥ ባልተረጋጋበት በዚህ ወቅት ምስሎቹ አሁን መውጣታቸው፣ የአሜሪካን የአየር ኃይልና በፍጥነት የረጅም ርቀት ጥቃት ለመፈጸም ያላትን ዝግጁነት የሚያሳይ ሆን ተብሎ የተላለፈ መልእክት ነው ይላሉ።

ናትና ዜና የአክሲዮስን ዘገባ በገለልተኛ አካል ማረጋገጥ አልቻለም። ዋይት ሃውስ ማንኛውም የጥቃት ትእዛዝ መሰጠቱን አላረጋገጠም።