የአሜሪካ ኤምባሲ ዜጎቹ ወደ ሰሜን ኢትዮጵያ እንዳይጓዙ አስጠነቀቀ
በላሊበላ አካባቢ ከባድ ውጊያ እየተካሄደ መሆኑ ተገልጿል፤ የኢትዮጵያ አየር መንገድ በረራዎችን አቋርጧል።

በአዲስ አበባ የሚገኘው የአሜሪካ ኤምባሲ፣ በሰሜናዊ ክፍል ኢትዮጵያ ያለውን አደገኛ የጸጥታ ሁኔታ አስመልክቶ፣ የአሜሪካ ዜጎች ወደ አማራ፣ ትግራይና አፋር ክልሎች ከመጓዝ ሙሉ በሙሉ እንዲቆጠቡ የሚጠይቅ ጠንካራ የጉዞ ማስጠንቀቂያ አውጥቷል።
ሐሙስ መስከረም 24 ምሽት በተሰራጨው መረጃ መሠረት፣ በአማራ ክልል በላሊበላ ከተማ አካባቢ ከባድ ውጊያ እየተካሄደ መሆኑን የሚያመለክቱ ዘገባዎች እንደደረሱት ኤምባሲው አስታውቋል።
ይህን ተከትሎ የኢትዮጵያ አየር መንገድ ከመስከረም 24 ጀምሮ ከላሊበላ አውሮፕላን ማረፊያ ወደ እና ከዚያ ያደርግ የነበሩትን በረራዎች ማቋረጡን በይፋ ገልጿል፤ በረራዎቹ መቼ እንደሚጀምሩ የሚገልጽ መረጃ እንደሌለው ኤምባሲው አስታውቋል። በትግራይ ክልል የኢንተርኔትና የቴሌፎን አገልግሎት መቋረጡን የሚገልጽ መረጃ እንዳለውም ጠቅሷል።
በእነዚህ ክልሎች የሚገኙ አሜሪካውያን፣ አስተማማኝ መስመር ካገኙ ከአካባቢው በአስቸኳይ እንዲወጡ፣ ይህ የማይቻል ከሆነ ግን የጸጥታው ሁኔታ እስኪሻሻል በሚገኙበት ቦታ ተጠልለው እንዲቆዩ ተነግሯቸዋል።
በተመሳሳይ ወቅት፣ በራያ-ቆቦ ግንባር አዲስና ሰፊ የውጊያ ግንባር መከፈቱንና፣ የዋግ ኃምራ መናገሻ የሆነችው ሰቆጣ በከፍተኛ ውጥረት ላይ መሆኗን የሚያረጋግጡ ዘገባዎች ወጥተዋል። በሰቆጣ ከተማ የኤሌክትሪክ ኃይል መቋረጥ መከሰቱንና የቴሌፎን አገልግሎት በከፊል መቋረጡን ነዋሪዎች ገልጸዋል።

