ኣብ ኣዲስ ኣበባ ዝርከብ ኤምባሲ ኣሜሪካ፣ ኣብ ሰሜናዊ ክፋል ኢትዮጵያ ዘሎ ሓደገኛ ኩነታት ጸጥታ ኣመልኪቱ፣ ዜጋታት ኣሜሪካ ናብ ክልላት ኣምሓራ፡ ትግራይን ዓፋርን ካብ ምጉዓዝ ሙሉእ ብሙሉእ ክቑጠቡ ዝጽውዕ ሓያል ናይ መገሻ መተሓሳሰቢ ኣውጺኡ።

ብሓሙስ 24 መስከረም ምሸት ብዝተዘርግሐ ሓበሬታ መሰረት፣ ኣብ ክልል ኣምሓራ ኣብ ከባቢ ከተማ ላሊበላ ከቢድ ውግእ ይካየድ ከምዘሎ ዘመልክት ጸብጻባት በጺሕዎ ከምዘሎ እቲ ኤምባሲ ሓቢሩ።

ነዚ ስዒቡ መንገዲ ኣየር ኢትዮጵያ ካብ 24 መስከረም ጀሚሩ ካብን ናብን መዓርፎ ነፈርቲ ላሊበላ ዘካይዶም ዝነበረ በረራታት ደው ከምዘበሎ ብወግዒ ሓቢሩ፤ እቲ በረራታት መዓስ ዳግማይ ከምዝጅምር ዝገልጽ ሓበሬታ ከምዘይብሉ ድማ እቲ ኤምባሲ ኣፍሊጡ። ኣብ ክልል ትግራይ ምቁራጽ ኣገልግሎት ኢንተርኔትን ቴሌፎንን ዝገልጽ ሓበሬታ ከምዘለዎውን ጠቒሱ።

ኣብዘን ክልላት ዝርከቡ ኣሜሪካውያን፣ ውሑስ መስመር እንተረኺቦም ካብቲ ከባቢ ብቕልጡፍ ክወጹ፣ እዚ ምስ ዘይከኣል ግን ኩነታት ጸጥታ ክሳብ ዝመሓየሽ ኣብ ዘለውዎ ቦታ ተዓቚቦም ክጸንሑ ተመሓላሊፉ ኣሎ።

ኣብ ተመሳሳሊ እዋን፣ ብግንባር ራያ-ቆቦ ሓድሽን ሰፊሕን ናይ ውግእ ግንባር ከምዝተኸፍተን፣ ርእሰ ከተማ ዋግሃምራ ዝኾነት ሰቖጣ ኣብ ልዑል ወጥሪ ምሕዳራን ዘረጋግጹ ጸብጻባት ወጺኦም። ኣብ ከተማ ሰቖጣ ምቁራጽ ሓይሊ ኤሌክትሪክ ከምዘጋጠመን ኣገልግሎት ቴሌፎን ብኸፊል ተቛሪጹ ከምዘሎን ነበርቲ ሓቢሮም።