ላዕለዋይ ልኡኽ መንግስቲ ኤርትራ ኣብ ካይሮ፤ ግብጺ ኣብ ልምዓት ኤርትራ ኣበርክቶ ክትገብር ምዃና ገሊጻ

ቅድሚ ክልተ ሰሙን ምስ ሰብ-ስልጣን ሱዑድያ ኣብ ምምዕባል ክልተኣዊ ዝምድናታትን ናይ ወፍሪ ስምምዓትን ዘተ ዘካየደ ላዕለዋይ ልኡኽ መንግስቲ ኤርትራ፡ ሎሚ ናብ ግብጺ ምእታዉ ተገሊጹ።

ሚኒስተር ወጻኢ ጉዳያት ግብጺ ዶክተር ባድር ዓብደላቲ፡ ምስቲ ብሓላፊ ቁጠባዊ ጉዳያት ህዝባዊ ግንባር ንደሞክራስን ፍትሕን ኣቶ ሓጎስ ገብረሂወትን ሚኒስተር ንግድን ኢንዱስትሪን ኣቶ ነስረዲን በኸትን ዝቘመ ላዕለዋይ ልኡኽ መንግስቲ ኤርትራ ድሕሪ ምርኻቡ፡ ግብጺ ኣብ ሃገራዊ ናይ ልምዓት ጻዕርታት መንግስቲ ኤርትራ ኣበርክቶ ንምግባር፡ ብፍላይ ከኣ ኣብ ጽላታት ቁጠባ፡ ወፍሪ፡ ንግዲ ከምኡ'ውን ኢንዱስትሪ ምስ ኤርትራ ስትራተጂካዊ ዝምድናታት ንምዕማቕ ዘለዋ ተወፋይነት ከምዝገለጸ ጸብጻባት እታ ሃገር ኣረጋጊጸን።

ግብጺ ንልኡላውነትን ግዝኣታዊ ሓድነትን ኤርትራ ምሉእ ደገፍ ከምዘለዋ ንልኡኽ ኤርትራ ደጊሙ ዘረጋገጸ ሚኒስተር ዓብደላቲ፡ ኣብ መንጎ ክልቲአን ሃገራት ዘሎ ምልውዋጥ ብዝለዓለ ደረጃ ኣብ ምህናጽን ምውህሃድን፡ ንግድን ሓባራዊ ወፍርን ንምትብባዕን ኣገዳሲ ምዃኑ ኣስሚሩሉ።

ግብጺ ኣብ ቀዳምነት ዝወሃቦም ዓውድታት ቴክኒካዊ ሓገዝን ህንጸት ዓቕምን ንምሃብ ድልውቲ ምዃና ዝገለጸ እቲ ግብጻዊ ሚኒስተር፡ ናይ ብሕቲ ኩባንያታት ግብጺ ኣብ ዕዳጋታት ኤርትራ ዝያዳ ተሳትፎ ንኽገብራን ከውፍራን ኣተባቢዑ።

ኣብቲ ኣብ ከተማ ካይሮ ዝተገብረ ዘተ፡ ክልቲአን ሃገራት ብቐደም ተኸተል ኣብ ኣስመራን ካይሮን በብእዋኑ ዘካይዳኦ ናይ ምምኽኻር መድረኻት ዘጠቓለለ፡ ኣብ ክልተኣዊ ጉዳያትን ሓባራዊ ኣገዳስነት ዘለዎም ዞባዊ ጉዳያትን፡ ብፍላይ ድማ ኣብ እዋናዊ ምዕባለታት ሱዳን፡ ሶማል ከምኡ'ውን ጸጥታ ቀይሕ ባሕሪ ኣመልኪቶም ዓሚቚ ዘተ ከምዘካየዱ ጸብጻባት እታ ሃገር ይሕብሩ።

ክልቲኦም ወገናት፡ ቀጻሊ ሓያል ርክባት ኤርትራን ግብጽን ሓደ ካብ ቀንዲ ዓንድታት ዞባዊ ሰላምን ምርግጋእን ምዃኑ ብምግላጽ፡ ነቲ ኣብ መንጎ ክልቲአን ሃገራት ዘሎ ክልተኣዊ ምትሕብባር ኣብ ጽላታት ቁጠባ፡ ፖለቲካ፡ ንግዲ፡ ሕርሻ፡ ጸዓትን ጥዕናን ዝያዳ ንምዕባይ ከምዝተሰማምዑ እውን ተገሊጹ።

ዑደት ላዕለዋይ ልኡኽ መንግስቲ ኤርትራ ናብ ግብጺ፡ ኣብ ቀረባ እዋን ተፈጢሩ ዘሎ ሓደስቲ ምዕባለታት ዞባናን ኣብ ዞባ ቀይሕ ባሕሪ ዘሎ ሰላምን ጸጥታን ንምርግጋጽን፡ ኤርትራ ምስ ግብጺ ዕሙቕ ዝበለን ኣድማዕን ምትሕብባር ተካይድ ምህላዋ ዘመልክት እዩ።