ኣብ ዓዲ ሃዎሻ ናይ 180,000 ሜተር ኪዩብ ሓድሽ ዲጋ ተመሪቑ

ሚኒስትሪ ዜና ኤርትራ (ሻባይት) ከምዝገለጾ፡ ብ26 መስከረም ኣብ ንኡስ ዞባ ጋላ ነፍሒ፡ ምምሕዳር ከባቢ ዓዲ ሃዎሻ ሓድሽ ዲጋ ተመሪቑ። እቲ ዲጋ 180,000 ሜተር ኪዩብ ማይ ዝሕዝ ኮይኑ፡ ብኣስታት 11 ሚልዮን ናቕፋ ወጻኢ፡ ብሓባራዊ ጻዕሪ ኣሃዱ ሓይልታት ምክልኻል፡ ምምሕዳር ከባብን ተቐማጦን ተሰሪሑ። ኣዛዚ ማእከል ስልጠና ሓይልታት ምክልኻል ኤርትራ ሜጀር ጀነራል ሮሞዳን ዑስማን ኣወልያይ እዩ መሪቕዎ። ኣወሃሃዲ ስራሕ ህንጻ ኢንጂነር ተስፋማርያም መንግስቱ፡ እቲ ዲጋ ንተቐማጦ ማይ ስቴ ኣብ ምቕራብን መስኖ ሕርሻ ኣብ ምዕባይን ዓብዪ ግደ ክህልዎ እዩ ኢሉ። ኣብቲ ናይ ምምራቕ ስነ ስርዓት ንዘበርከቱ ኣካላት ናይ ምስጋና ወረቓቕቲ ተዋሂቡ።