ኣክለድ፡ ሓይልታት ኤርትራ ብዛላምበሳ ዶብ ከምዝሰገሩን ድሮናት ኢትዮጵያ ኣብ ጉዓዳ መጥቃዕቲ ከምዝፈጸሙን ገሊጹ

ኣክለድ (ACLED)፡ ኣብ 7 ጥቅምቲ ሓይልታት ኤርትራ ብዛላምበሳ ዶብ ሰጊሮም ናብ መስመር ዓዲግራት-ዕዳጋ ሓሙስ ገጾም ከምዝተንቀሳቐሱን፡ ድሮናት መከላኸሊ ሰራዊት ኢትዮጵያ ድማ ኣብ ጉዓዳ ብመካይን ኣብ ዝንቀሳቐሱ ዝነበሩ ወተሃደራት ኤርትራ መጥቃዕቲ ከምዝፈጸሙን ገሊጹ።

ኣብ ኣክለድ ክኢላ ዞባ ምብራቕ ኣፍሪቃ ዶ/ር ጀላለ ጌታቸው ቢሩ፡ ሓይልታት ኤርትራ ናብቲ ኣብ ትግራይ ዝካየድ ኲናት ዝኣተዉ፡ ሰራዊት መንግስቲ ኢትዮጵያን መሓዙቱን ናብ ዶብ ከይበጽሑ ንምዕጋት እዩ ኢሉ። ከምኡ ድማ ሓይልታት ትግራይ ኣብ ኣጽቢን ክልተ ኣውላዕሎን ወረዳታት ብብዝሒ ተዘርጊሖም ኣለዉ ኢሉ። ኣክለድ ቁጽሪ ግዳያት ኣይገለጸን።

ብዘይካዚ፡ ኣዛዚ ናይቲ ምስ መንግስቲ ዝስራዕ ሓይሊ ሰላም ትግራይ ገብረእግዚኣብሄር በየነ፡ ሰራዊት ኤርትራ ብዩኒፎርምን ብኸበድቲ ኣጽዋርን ናብ ትግራይ ኣትዩ ኣሎ፡ ብድሮን ድማ ይህረም ኣሎ ክብል ንሮይተርስ ተዛሪቡ።

መንግስቲ ኢትዮጵያ ይኹን ሰራዊቱ ብዛዕባ እቲ ኣብ ጉዓዳ ዝተፈጸመ መጥቃዕቲ ዝገለጽዎ ነገር የለን። ሚኒስተር ዜና ኤርትራ የማነ ገብረመስቀል፡ ሓይልታት ኤርትራ ኣብ ትግራይ ከምዘየለዉ ነጺጉ። እዞም ጸብጻባት ብናጻ ኣይተረጋገጹን።