ኢትዮጵያ ዲፕሎማሰኛ ግብጺ ኣብ ውሽጢ 48 ሰዓት ካብ ሃገር ክወጽእ ኣዚዛ፤ ግብጺ ድማ ኣማኻሪ ኤምባሲ ኢትዮጵያ ኣብ ካይሮ ክወጽእ ኣዚዛ

ፕረዚደንት ግብጺ ዓብደልፈታሕ ኣልሲሲ፡ ግብጺ ሃገራዊ ረብሓኣ እናሓለወት ንዲፕሎማስን ሰላማዊ ፍታሕን ቦታ ትህብ ከምዘላ ከምዝገለጸ ዘ ናሽናል ብዓርቢ ሓቢሩ። እዚ ዘረባ እዚ ድሕሪ እተን ክልተ ሃገራት ንሓድሕደን ዲፕሎማሰኛታት ምስጓገን ዝመጸ እዩ።

ዘ ናሽናል ዓርቢ፡ እቲ ኢትዮጵያ ካብ ሃገር ክወጽእ ዝኣዘዘቶ ዲፕሎማሰኛ ግብጺ ኣሕመድ ሞሓረም ኣሕመድ ሱለይማን ምዃኑን ኣብ ውሽጢ 48 ሰዓት ክወጽእ ተኣዚዙ ምህላዉን ገሊጹ። እቲ ጋዜጣ ዝጠቐሶ ምንጪ ካይሮ፡ ግብጺ ኣብ ውሽጣዊ ጉዳይ ናይ ካልኦት ሃገራት ኢድ ምእታው ወትሩ ከምእትነጽግ ኢሉ።

ግብጺ ነቲ ውሳነ ኢትዮጵያ "ዘሕዝንን ዘይምኽኑይን" ክትብል ገሊጻቶ። ምንጪ ካብ ግብጺ፡ ካይሮ ኣብ ውሽጣዊ ጉዳያት ካልኦት ሃገራት ኢድ ናይ ዘይምእታው ጽኑዕ መትከል ከምዘለዋ ገሊጹ፤ ኢትዮጵያ ንውሽጣዊ ቅልውላዋ ናብ ግዳማዊ ኣካላት ከተላግብ ትፍትን ኣላ ክብል ድማ ከሲሱ። ሚኒስትሪ ጉዳያት ወጻኢ ኢትዮጵያ ስምምዕ ቬና ጥራይ ጠቒሳ፡ ምኽንያት ኣይሃበትን። ራድዮ ተማዙጅ እቲ ዝተሰጎገ ዲፕሎማሰኛ ግብጺ ኣሕመድ ሞሃረም ኣሕመድ ሱሌማን ምዃኑ ገሊጹ።

ወኪል ዜና መንግስቲ ግብጺ MENA ዓርቢ ከም ዝሓበሮ፡ ግብጺ ኣብ ካይሮ ዝርከብ ኣማኻሪ ኤምባሲ ኢትዮጵያ "ዘይተደለየ ሰብ" ምዃኑ ኣፍሊጣ ኣብ ውሽጢ 48 ሰዓት ክወጽእ ኣዚዛቶ። ሓደ ሓላፊ ግብጺ፡ እቲ ስጉምቲ ግብረ መልሲ ምዃኑን ውሳነ ኢትዮጵያ ድማ "ዘሕዝንን ቅኑዕ ዘይኮነን" ምዃኑን ገሊጹ።