ሶማልያ ኣብ ጉዳይ ኢትዮጵያን ኤርትራን ዘይሻራዊት ምዃና ገሊጻ፤ ምስ ግብጽን ኤርትራን ሻራ ሒዛ ዝብል ክሲ ነጺጋ

ጋሮወ ኦንላይን፡ ምክትል ሚኒስተር ጉዳያት ወጻኢ ሶማልያ ሓሰን መሓመድ ዓሊ (ናዳራ) ንቢቢሲ፡ «ሶማልያ ኣብዚ ጉዳይ ዘይሻራዊት እያ» ኢሉ ከምዝተዛረበ ገሊጹ። ምስ ኢትዮጵያ ዘሎ ዝምድና ርጉእ እዩ ኢሉ፤ ሰራዊት ኢትዮጵያ ኣብ ዕላማ ሕብረት ኣፍሪቃ ኣብ ሶማልያ ኣገልግሎቱ ቀጺሉ ምስ ፈደራላዊ ምምሕዳር ይሰርሕ ኣሎ ኢሉ፡ ኢትዮጵያ ሰራዊታ ክትስሕብ እያ ዝብል ወግዓዊ መልእኽቲ ድማ ኣይበጽሖን ኢሉ። ምስ ኤርትራ ዘሎ ዝምድና ኣይተቐየረን ኢሉ፤ ሶማልያ ምስ ግብጽን ኤርትራን ሻራ ሒዛ ዝብል ድማ ነጺጉ። ሶማልያ ሻራ ከይሓዘት ዲፕሎማስያዊ ዝምድና ክህልዋን ስምምዓት ክትክትምን ትኽእል እያ ኢሉ። ኣብ ኢትዮጵያ ዝህሉ ተወሳኺ ውጥረት ኣብ ቁጠባ፡ ጸጥታን ምንቅስቓስ ዶብን ሶማልያ ሳዕቤን ክህልዎ ይኽእል እዩ ኢሉ። ናትና ኒውስ ካብ ኢትዮጵያ፡ ኤርትራን ግብጽን ብዛዕባ እዚ ዝተዋህበ መግለጺ ኣይረኸበን።