ሕቡራት ሃገራትን ሕብረት ኣፍሪቃን ናይ ኦባሳንጆ ሓድሽ ጻዕሪ ምምእዛን ደጊፎም፤ ኣብ ሰሜን ኢትዮጵያ ናብ ቀጥታዊ ዘተ ክምለሱ ጸዊዖም

ሕቡራት ሃገራትን ሕብረት ኣፍሪቃን፡ ነቲ ላዕለዋይ ወኪል ሕብረት ኣፍሪቃ ኣብ ቀርኒ ኣፍሪቃ ዝኾነ ናይ ቀደም ፕረዚደንት ናይጀርያ ኦሉሰጉን ኦባሳንጆ ዘካይዶ ዘሎ ሓድሽ ጻዕሪ ምምእዛን ከምዝድግፍዎ ገሊጾም፤ እቶም ኣብ ሰሜን ኢትዮጵያ ዘለዉ ኣካላት ናብ ቀጥታዊ ዘተ ክምለሱ ጸዊዖም።

እቲ ሓባራዊ መግለጺ፡ ናይ ክልቲኡ ትካላት ሓባራዊ ግብረ ሓይሊ ሰላምን ጸጥታን ኣብ 26 መስከረም ኣብ ኒው ዮርክ ኣብ ዘካየዶ መበል 27 ናይ ምይይጥ ኣኼባ ዝወጸ እዩ። እቲ መግለጺ፡ ክልቲኡ ትካላት ብዛዕባ እቲ ኣብ ሰሜን ኢትዮጵያ ዘጋጠመ ናይ ጸጥታ ፍጻመታትን ዝዛየደ ውጥረትን ስክፍታኦም ከምዝገለጹ ይሕብር።

እቲ መግለጺ ከምዘስፈሮ፡ ክልቲኡ ትካላት ነቲ ናይ ኦባሳንጆ ጻዕሪ፡ ቀጥታዊ ዘተን ልዝብን ኣብ መንጎ እቶም ኣካላት ንምምላስን ውዕል ነባሪ ምቁራጽ ተጻብኦ ንምትግባርን፡ ጽኑዕ ደገፎም ደጊሞም ኣረጋጊጾም።

ኣብቲ ኣኼባ ኮሚሽነር ፖለቲካዊ ጉዳያት፡ ሰላምን ጸጥታን ሕብረት ኣፍሪቃ ኣምባሳደር ባንኮለ ኣደዮየ፡ ከምኡ እውን ናይ ሕቡራት ሃገራት ትሕቲ ዋና ጸሓፊ ሮዝመሪ ዲካርሎ፡ ዠን-ፒየር ላክሩኣን ኣቱል ካረን ተረኺቦም። እቲ መግለጺ ንትግራይ ብስማ ኣይጠቐሰን።