ሱዳንን ግብጽን ክሲ ሓለቓ ስታፍ ሰራዊት ኢትዮጵያ ነጺገን፤ ሱዳን RSF ካብ መሬት ኢትዮጵያ ደገፍ ረኺቡ ኢላ

ሰራዊት ሱዳን፡ ሓለቓ ስታፍ ሓይልታት ምክልኻል ኢትዮጵያ ፊልድ ማርሻል ብርሃኑ ጁላ፡ ካርቱም ነቲ ኣንጻር ፈደራላዊ መንግስቲ ኢትዮጵያ ዝዋጋእ ዘሎ ዕጥቃዊ ኪዳን ትድግፍ ኣላ ዝበሎ ክሲ ነጺጉ። ሱዳን ትሪብዩን ብ27 መስከረም ከምዝገለጾ፡ ቃል ኣቀባሊ ሰራዊት ሱዳን ዓሲም ዓወድ ዓብደልወሃብ፡ ‘እቲ ሓይልታት ምክልኻል ነዚ ክሲ ብንጹር ይነጽጎ፡ መሰረት ዘይብሉ ክሲ ድማ ይቖጽሮ’ ኢሉ። ብወገኑ፡ ጉጅለ ራፒድ ሰፖርት ፎርስስ (RSF) ካብ መሬት ኢትዮጵያ ስልጠና፡ ሎጂስቲክስን ኣንጻር ሱዳን ዝተተኮሱ ስትራተጂካውያንን ካሚካዘን ድሮናትን ዘጠቓልል ደገፍ ረኺቡ ኢሉ ከሲሱ፤ ኣዲስ ኣበባ ውጥረት ንምውራድ ብዘተን ብወግዓዊ ዲፕሎማስያዊ መስመራትን ክትጥቀም ጸዊዑ። ብዘይካዚ፡ ሓበሬታ ዘለዎ ግብጻዊ ምንጪ ንኣሻርቕ ኣል-ኣውሰጥ ከምዝሓበሮ፡ እቲ ናይ ኢትዮጵያ ምልክታት ‘መልሲ ዘየድልዮ ክሲ’ እዩ፡ ካይሮ ‘ምስዚ ዓይነት ክርክር ዝኾነ ርክብ የብላን’፡ ግብጺ ድማ ኣብ ውሽጣዊ ጉዳይ ካልኦት ሃገራት ዘይምትእትታው ፖሊሲ ትኽተል። ብርሃኑ ጁላ ንግብጽን ሱዳንን ደገፍቲ እቲ ኪዳን ኢሉ ከሲሱ ነይሩ፡ ኤርትራ ድማ ኣብ መንጎ ደገፍቲ ደገን ኣብ ውሽጢ ኢትዮጵያ ዝርከቡ ዕጥቃውያን ጉጅለታትን መራኸቢ ኮይና ትሰርሕ ኣላ ኢሉ። ኤርትራ ነቲ ክሲ ነጺጋቶ። እዘን ክስታት ካብ ክልቲኡ ወገን ብናጻ ክረጋገጻ ኣይተኻእለን።