ስዑዲ ዓረብ ኣብ ሰንዓን ሰለስተ ኣውራጃታት የመንን መጥቃዕቲ ነፈርቲ ከምዘካየደት ሑቲ ገሊጹ

ዕጡቕ ጉጅለ ሑቲ የመን፡ ስዑዲ ዓረብ ኣብ ልዕሊ ርእሰ ከተማ ሰንዓን ኣውራጃታት ሳኣዳ፡ ታይዝን ዓምራንን መጥቃዕቲ ነፈርቲ ከምዘካየደት ገሊጹ።

ብሑቲ ዝመሓደር ማዕከን ዜና ሳባ፡ እተን ነፈርቲ ኣብ መላእ እተን ኣውራጃታትን ኣብ ሰንዓን ሓያሎ ቦታታት ዕላማ ከምዝገበራ ሓቢሩ። ወተሃደራዊ ወሃቢ ቃል እቲ ጉጅለ ብወገኑ፡ ኣብ ውሽጢ 24 ሰዓታት 47 መጥቃዕትታት ከምዝተፈጸሙ ገሊጹ። ብዛዕባ ዝወረደ ጉድኣት ዝርዝር ኣይተዋህበን።

ወሃቢ ቃል እቲ ብስዑዲ ዓረብ ዝምራሕ ኪዳን ብርጋዴር ጀነራል ቱርኪ ኣል-ማሊኪ፡ ናብ ከተማታት ካሚስ ሙሻይትን ጃዛንን ዝተወንጨፉ ሰብ-ኣልቦ ነፈርትን ባሊስቲክ ሚሳይላትን ከምዝተበርዓኑ ኣፍሊጡ። ሑቲ ቅድሚ ክልተ መዓልቲ ኣብ መዲና ዝርከብ መመንጨዊ ሓይሊ ኤሌክትሪክ ታይባ ዕላማ ከምዝገበረ'ውን ጠቒሱ።

ሚኒስትሪ ወጻኢ ጉዳያት ግብጺ ነቲ ኣብ መመንጨዊ ሓይሊ ኤሌክትሪክ ዝተፈጸመ መጥቃዕቲ ብትሪ ከምዝኾነኖን፡ ስዑዲ ዓረብ ጸጥታኣ ንምሕላው ንእትወስዶ ስጉምቲ ደገፋ ከምዘረጋግጽን ኣፍሊጡ።

እቶም ዝተገልጹ ቁጽርታትን ዕላማታትን ካብ ወገን ሑቲ ዝወጹ እዮም፤ ናትና ቲቪ ብገዛእ ርእሱ ከረጋግጾም ኣይከኣለን።