ትካል ዕደና ቢሻ ስራሕ ኣቋሪጹ፤ ሚኒስተር የማነ ንጽገና እዩ ኢሉ

ብሎምበርግ ብ15 ጥቅምቲ ከምዝገለጾ፡ እቲ ኣብ ዞባ ጋሽ ባርካ ዝርከብ ናይ ነሓስን ዚንክን ትካል ዕደና ቢሻ ምስራሕ መዓድን ኣቋሪጹ ኣሎ።

እታ 55 ሚእታዊት ብርኪ ዝወነነትን ነቲ ዕደና እተመሓድርን ዚጂን ማይኒንግ፡ እቲ ፋብሪካ ንልሙድ ጽገና ከምዝተዓጽወን እቲ ጽገና ብሰንኪ ግዝያዊ ከባብያዊ ሕጽረት ነዳዲ ካብ መወዳእታ ዓመት ናብ ቅድሚኡ ከምዝተቐየረን ገሊጻ። ቀረብ ነዳዲ ከምዝተረጋግአ ድማ ወሲኻ ገሊጻ፤ ስራሕ መዓስ ከምዝጅምር ግና ኣይገለጸትን።

ገለ ዓደግቲ ዚንክን ነሓስን ናይቲ ዕደና፡ እቲ ምቁራጽ ክሳብ ኣርባዕተ ሰሙን ክወስድን ጽዕነት ከደናጒን ከምዝኽእል ተነጊሮም ኢሉ ጸብጻብ ብሎምበርግ። እቲ ጸብጻብ ብናጻ ኣይተረጋገጸን።

ሚኒስተር ዜና ኤርትራ የማነ ገብረመስቀል፡ ነቲ ኣመሓደርቲ እቲ ዕደና ዝሃብዎ ሓበሬታ ብምጥቃስ፡ እቲ ፋብሪካ ንጽገና ከምዝተዓጽወን ስራሕ ኣብ ቀረባ እዋን ክጅምር ምዃኑን ገሊጹ።

እቲ ዝተረፈ 45 ሚእታዊት ብርኪ ብሃገራዊ ትካል ዕደና ኤርትራ (ENAMCO) ዝተታሕዘ እዩ። እቲ ዕደና ኣብ ዝሓለፈ ዓመት ኣስታት 83,000 ቶን ዚንክን 23,000 ቶን ነሓስን ኣፍርዩ።