ግብጺ ናጽነት መጓዓዝያ ኣብ ቀይሕ ባሕርን ባብኤል መንደብን ጠሊባ፤ ጸጥታኡ ናይተን መዳውብቲ ሃገራት ሓላፍነት እዩ ኢላ

ሚኒስተር ጉዳያት ወጻኢ ግብጺ በድር ዓብደላጢ፡ ናጽነት መጓዓዝያ ኣብ ቀይሕ ባሕርን ባብኤል መንደብን ክዕቀብ ከምዘለዎ ገሊጹ። ጸጥታ እዞም መተሓላለፍቲ ማያት ድማ ናይተን ኣብኦም ዝርከባ ዓረባውያንን ኣፍሪቃውያንን ሃገራት ሓላፍነት ምዃኑ ኣስሚሩሉ።

ዓብደላጢ እዚ ዝበለ ብ28 መስከረም ኣብ ካይሮ ምስ ፍሉይ ልኡኽ ውድብ ሕቡራት ሃገራት ንየመን ሃንስ ግሩንድበርግ ኣብ ዝገበሮ ርክብ እዩ።

እቲ ሚኒስተር፡ ምርግጋእ እዚ መተሓላለፊ ማይ ምስ ዓለማዊ ቁጠባ፡ ብፍላይ ምስ ዓለምለኻዊ ንግድን ናይ መግብን ጸዓትን ሰንሰለት ኣቕርቦትን ብቐጥታ ከምዝተኣሳሰር ገሊጹ። ጸጥታ ቀይሕ ባሕርን ወሽመጥ ዓደንን ምስ ዓለማዊ ቁጠባ ብቐጥታ ዝተኣሳሰር ምዃኑ እውን ወሲኹ ሓቢሩ።