ኣልሲሲ ንስዑዲ ዓረብ ወተሃደራዊ ሓገዝ ዝፈቅድ ውሳነ ንፓርላማ ሓቲቱ

ፕረዚደንት ግብጺ ዓብደልፈታሕ ኣልሲሲ፡ ንስዑዲ ዓረብ ክወሃብ ዝኽእል ወተሃደራዊ ሓገዝ ኣብ ዝምልከት ካብ ባይቶ ሃገሩ ፍቓድ ከምዝሓተተ ሮይተርስ ገሊጹ።

ኣልሲሲ ነዚ ዝሓበረ፡ ቀንዲ ወተሃደራዊ ኣካዳሚ ግብጺ ኣብ ውሽጢ 30 ኣዋርሕ መጻኢ መራሕቲ ንምስልጣን ዘውጽኦ ውጥን ኣብ ዘቕረበሉ እዩ።

ሪያድ ናይ ሓገዝ ሕቶ እንተቕሪባ፡ ሰራዊት ግብጺ ንስዑዲ ዓረብ ሓገዝ ክገብር ስልጣን ዝህብ ህጹጽ ናይ ፓርላማ ኣኼባ ክካየድ ሓቲቱ።

ቤት ጽሕፈት ፕረዚደንት ግብጺ ብወገኑ፡ ጸጥታ፡ ምርግጋእን ግዝኣታዊ ሓድነትን ስዑዲ ዓረብ ንምሕላው ኩሉ ኣድላዪ ሓገዝ ንምሃብ ድልውቲ ምዃና ኣፍሊጡ።

ፓርላማ እታ ሃገር በዚ ጉዳይ ብ26 ጥቅምቲ ኣኼባ ከምዘካይድ ተሓቢሩ። እዚ ዝመጸ፡ ብኢራን ዝድገፉ ዕጡቓት ሑቲ የመን ኣብ ልዕሊ ስዑዲ ዓረብ ዘካይድዎ መጥቃዕቲ እናወሰኸ ኣብ ዝኸደሉ እዋን እዩ።