ኢራን ነቲ ሓደ ካብ ኣገደስቲ መጻብቦታት ዓለምና ዝኾነ ሆርሙዝ ኣብ ውሽጢ ሓደ ሰሙን ንኽትከፍቶ፣ ንኣሜሪካ ሰለስተ ቅድመ ኩነት ኣቕሪባ።

ኣሜሪካ ነቲ ኣብ ወደባት ኢራን ዝገበረቶ ናይ ሓይሊ ባሕሪ እገዳን ኣብ ልዕሊ መሸጣ ነዳዲ ዘሎ እገዳን እንተ ኣልዒላ፣ ከምኡውን ንሊባኖስ ዘጠቓለለ ተኹሲ ደው ናይ ምባል ስምምዕ እንተተቐቢላቶ፣ ኢራን ኣብ ውሽጢ 7 መዓልታት መጻብቦ ሆርሙዝ ክትከፍቶን ብዛዕባ ኒዩክለራዊ መደባታ ዳግማይ ዝርርብ ክትጅምርን ምዃና ገሊጻ።

ሚኒስተር ጉዳያት ወጻኢ ኢራን ኣባስ ኣራግቺ ብዓርቢ 25 መስከረም ኣብ ኣፍደገ ባይቶ ጸጥታ ሕቡራት ሃገራት ንጋዜጠኛታት ኣብ ዝሃቦ መግለጺ፣ እቲ ናይ 7 መዓልታት ናይ ግዜ ሰሌዳ ዝጅምረሉ፣ ኣሜሪካ ነዞም ሕቶታት ካብ ዝተቐበለቶም ሰዓት ንድሓር ምዃኑ ተዛሪቡ።

እቲ ናይ ፈለማ ምድላዋት ካብ 4 ክሳብ 5 መዓልታት ክወስድ ምዃኑን እቲ ወሽመጥ ድማ ኣብ ሻድሻይ መዓልቲ ምሉእ ብምሉእ ክፉት ክኸውን ምዃኑን ኣረዲኡ። ኣብ ሻብዓይ መዓልቲ ድማ ምስ ኣሜሪካ ናይ መወዳእታ ዝርርብ ከምዝጅምር ገሊጹ።

እቲ 20 ሚእታዊት ንግዲ ነዳድን ተፈጥሮኣዊ ጋዝን ዓለምና ዝሓልፈሉ መጻብቦ ሆርሙዝ፣ ብኢራን ምዕጻዉ እታ ሃገር እትጥቀመሉ ቀንዲ ዓለማዊ ጸቕጢ ትፈጥረሉ መሳርሒ ኮይኑ ምህላዉ ይፍለጥ።

ዋይት ሃውስ ኣብ ዝሃቦ ሓጺር መልሲ፣ ሰበስልጣን ኣሜሪካ ኣወንታውን ሃናጽን ዘተ የካይዱ ከምዘለዉ ጥራይ ኣፍሊጡ።