ኣብ መበል 81 ሓፈሻዊ ጉባኤ ሕቡራት ሃገራት መደረ ዘስምዐ ፕረዚደንት ኢራን ማሱድ ፔዘሽክያን፣ ንኣሜሪካን እስራኤልን ብተግባራተን ከም ዝጣዓሳ ክንገብረን ኢና ክብል ኣፈራሪሑ።

ሃገሩ ኒዩክለራዊ ኣጽዋር ንምምዕባል ሓሳብ ከምዘይብላ ብምግላጽ፣ ናይ ኒውክሌር ስነፍልጠትን ሰላማዊ ቴክኖሎጂ ናይ ምምዕባል ምንቅስቓስን ግን ደው ከምዘይተብሎ ንተጋባእቲ እቲ ኣኼባ ደጊሙ ብወግዒ ኣፍሊጡ።

ኢራን፣ ኒዩክለራዊ ፍልጠት ኣብ ትሕቲ ምቁጽጻር ውሑዳት ሃገራት ክኸውን ከምዘይትቕበሎ ዝበለ እቲ ፕረዚደንት፣ ሃገሩ ዝኾነ ኣካል ጸጥታ ባሕሪ ማእከላይ ምብራቕ ክወስድ ከምዘይትፈቅድን፣ ንምክልኻል ሃገሮም እንተኾይኑ ንዝኾነ ውግእ ከምዘይፈርሑን፣ ኣብ ተመሳሳሊ እዋን ድማ ናይ ሰላም ዝርርብ ንጎኒ ከምዘይገድፉን ገሊጹ።

ንሕና ሃገርና ክንከላኸል ኢና ንደሊ እምበር፣ ካልኦት ሃገራት ክንወርር ኣይኮነን ክብል ወሲኹ። ኣቶሚክ ቦምብ ዝሓዘት እስራኤል እያ ዝበለ እቲ ፕረዚደንት፣ ተቖጻጸርቲ ኒውክሌር ግን ናብ ኢራን ከምዝኣተዉ ብምጥቃስ፣ እስራኤል ትቐትል፡ ኢራን ከኣ ትእገድ ክብል ተዛሪቡ።

ፕረዚደንት ኣሜሪካ ዶናልድ ትራምፕ ኣብቲ ዋዕላ ንኢራን ምፍርራሕ ዝተሓወሶ መደረ ከምዘስምዐ ዝፍለጥ ኮይኑ፣ ፔዘሽክያን ነዚ ኣመልኪቱ፣ እዚ ብሓይሊ ጸቕጢ ምግባር ዘርኢ ምልክት እዩ ብምባል፣ ጸላእቲ ሃገሩ ጸቕጢ ክገብሩ እኳ እንተፈተኑ፣ ኢራን ንወረርታ ብተግባራቶም ከም ዝጣዓሱ ክትገብር ምዃና ገሊጹ።

ኣብ ማእከላይ ምብራቕ ብዘሎ ኩነታት ኣመልኪቱ ድማ፣ ዝኾነት ሓንቲ ሃገር ብበይና ውሕስነት ከምዘይህልዋ ብምግላጽ፣ ጸጥታ ብሓባር ንሃንጽ፡ ምስ ሰኣንናዮ ድማ ሳዕቤኑ ብሓባር ኢና ንገጥሞ ክብል፣ ንጎረባብቲ ሃገራት ዝምልከት መልእኽቲ ኣመሓላሊፉ።