ናታንያሁ ንሃገራዊ ምርጫ ኣብ ዝዳለወሉ ዘሎ እዋን፡ ኣብ ልዕሊኡ ጸቕጢ ዝፈጥር ሚስጥራዊ ጸብጻብ ምውጽኡ ተገሊጹ።

ብመሰረት መርማሪ ጸብጻብ መጽሄት ኣትላንቲክ፡ ናይቲ ሽዑ እዋን ግብጻዊ ሓላፊ ስለያ ዓባስ ካሚል፡ ብ26 መስከረም 2023 — ቅድሚ እቲ ብ7 ጥቅምቲ 2023 ዝተፈጸመ መጥቃዕቲ ሓማስ 11 መዓልታት — ምስ ስለያ ግብጺ ምትእስሳር ዘለዋ ነፋሪት ኣቢሉ ናብ እስራኤል ኣትዩ ነይሩ።

እታ ነፋሪት ናብ ካይሮ ቅድሚ ምምላሳ ን67 ደቓይቕ ኣብታ ሃገር ምጽንሓ እቲ ጸብጻብ ኣረጋጊጹ።

እቲ ግብጻዊ ሓላፊ ስለያ ኣብ ዑደቱ፡ ሓማስ ንዓቢ መጥቃዕቲ ዝንቀሳቐስ ዘሎ ከምዝመስልን ሓደጋ ንምክልኻል ግዜ ከምዘየለን ኣጠንቂቑ ከምዝነበረ እታ መጽሄት ሓቢራ። ይኹን እምበር፡ ዕለት ይኹን ዒላማ ዝኾኑ ቦታታት ዝርዝር ሓበሬታ ከምዘይሃበ ተገሊጹ።

ቤት ጽሕፈት ናታንያሁ፡ ቀዳማይ ሚኒስተር ብቐጥታ ይኹን ብተዘዋዋሪ ካብ ግብጺ ዝኾነ መጠንቀቕታ ከምዝተቐበለ ዝገልጽ ሓበሬታ ድሕሪ መጥቃዕቲ 7 ጥቅምቲ ነጺግዎ ነይሩ። ኣብቲ እዋን ንባይቶ ሃገራዊ ድሕነት እስራኤል ዝመርሕ ዝነበረ ጻኪ ሃነግቢ'ውን ነዚ ጸብጻብ ነጺግዎ።

እቲ ጸብጻብ ፍሉይ ኣቓልቦ ረኺብሉ ዘሎ፡ እስራኤል ኣብ ዝመጽእ ወርሒ ንምርጫ ኣብ እትዳለወሉን ብዛዕባ እቲ ናይ ሽዑ ውድቀት ነጻ መርመራ ክካየድ ኣብ ዝተፈቐደሉን እዋን ስለዝወጸ'ዩ።