ሚኒስተር የማነ፡ ሰልፊ ብልጽግና ባዕሉ ንዝፈጠሮም ጸገማት ንጎረባብቲ ይኸስስ ኣሎ ኢሉ

ሓላፊ ጠቕላላ ስታፍ ሓይልታት ምክልኻል ኢትዮጵያ ፊልድ ማርሻል ብርሃኑ ጁላ፡ ጎረባብቲ ሃገራት ኤርትራን ሱዳንን ንሓድሽ ዝተመስረተ ሓባራዊ ኪዳን ዕጡቓትን ናይ ፖለቲካ ጉጅለታትን ይሕግዛ ኣለዋ ክብል ድሕሪ ምኽሳሱ፡ ሚኒስተር ዜና ኤርትራ የማነ ገብረመስቀል ሎሚ ሶኒ 28 መስከረም ኣብ ማሕበራዊ መራኸቢ ኤክስ ገጹ መልሲ ሂቡ።

ሰልፊ ብልጽግና ባዕሉ ንኣስታት ሰለስተ ዓመታት ዝፈጠሮም ጸገማት ንጎረባብቲ ሃገራት ይኸስስ ኣሎ ዝበለ ሚኒስተር የማነ፡ ነዚ ንምግላጽ ሰለስተ ዓበይቲ ፍጻሜታት ብቐደም ተኸተል ኣቕሪቡ።

ቀዳማይ፡ ኣብ ወርሒ ጥቅምቲ 2023 እቲ ሰልፊ ብሰላማዊ መንገዲ ልኡላዊ ኣፍደገ ባሕሪ ንምውሓስ፡ ኣድላዪ እንተኾይኑ ድማ ብሓይሊ ዝብል ጎስጓሱ ብወግዒ ምጅማሩ።

ካልኣይ፡ በቲ ተመሳሳሊ ህርፋን ምውናን ኣፍደገ ባሕሪ፡ ብዓለም ደረጃ ኣፍልጦ ዘይረኸበት ኣካል ሶማል ንዝኾነ ሶማሊላንድ፡ ልኡላዊ መሰል ሓንቲ ሃገር ብምጥሓስ ኣፍልጦ ክህብ ምፍታኑ።

ሳልሳይ፡ ናይ ኢማራት ወኪል ኣብ ቀርኒ ኣፍሪቃ ብምዃን ኲናት ሱዳን ንከየብቅዕ፡ ንሓይልታት ቅልጡፍ ደገፍ ኣብ መሬቱ ወተሃደራዊ መዓስከር ብምስራዕን ኣብ ልዕሊ ሰራዊት ሱዳን መጥቃዕትታት ድሮን ንምፍጻም ባይታ ብምጥጣሕን ኣህጉራዊ ሕጊ ምጥሓሱ።

ኣብ መወዳእታ ሚኒስተር የማነ፡ ንኢትዮጵያ ዝመርሕ ዘሎ ሰልፊ ብልጽግና ሕጂ'ውን ምንጪ ዞባዊ ወጥሪ ኮይኑ ምህላዉ ደጊሙ ኣረጋጊጹ።