ሚኒስተር ጉዳያት ወጻኢ ኤርትራ ዑስማን ሳልሕ፡ ምስ ዝተፈላለዩ መዘንኡ ዘካይዶ ዘሎ ክልተኣዊ ርክባት ብቀዳም 26 መስከረም'ውን ቀጺሉ።

ምስ ሚኒስተር ጉዳያት ወጻእን ኣህጉራዊ ምትሕብባርን ሪፓብሊክ ሱዳን ኣምባሳደር ሞሂ-ኤልዲን ሳሌም ኣብ ዘካየዶ ዘተ፡ ኣብ ክልተኣዊ ዝምድና ኤርትራን ሱዳንን ከምኡ'ውን ኣብ ክልቲኣዊ ረብሓ ዘለዎም ዞባዊ ጉዳያት ሓሳብ ንሓሳብ ከምዝተለዋወጠ፡ ቤት ጽሕፈት ወኪል ኤርትራ ኣብ ሕቡራት ሃገራት ሓቢሩ።

ኣብ ተመሳሳሊ ዕለት ድማ ምስ ሚኒስተር ጉዳያት ወጻኢ ዖማን ሰይድ በድር፡ ኣብ መንጎ ክልቲኤን ኣሓት ሃገራት ንዘሎ ርክብ ንምዕማቝ ዝዓለመ ዝርርብ ኣካዪዱ።

እቲ ዘተ ሓባራዊ ስክፍታታት ዘለዎም ዝተፈላለዩ ዞባውን ኣህጉራውን ጉዳያት ዘጠቓለለ ምንባሩ እቲ ቤት ጽሕፈት ገሊጹ።