ሚኒስተር ሚኒስትሪ ዜና ኣቶ የማነ ገብረመስቀል፡ ኣሜሪካ ንኤርትራ ዝጸሉ እገዳ ንምልዓል ዝወሰደቶ ውሳኔ ብሓጎስ ከምዝቕበሎ ገሊጹ።

ነቲ ስጉምቲ፡ ውህሉል ናይቲ ሃናጺ ዝኾነ ፖለቲካዊ ሰናይ ድሌት ክልቲኤን ሃገራት ዘንጸባርቕ ከምዝኾነን፡ ኣብ ክልተኣዊ ምትሕግጋዝ ብፍላይ ድማ ኣብ ወፍርን ንግድን ሓድሽ ምዕራፍ ክኸፍት ከምዝኽእልን ኣረዲኡ።

ሚኒስተር የማነ ነዚ ዝገለጸሉ ምስ ጋዜጣ Asharq Al-Awsat ኣብ ዝገበሮ ሰፊሕ ቃለ መሕትት ኮይኑ፡ እቲ እገዳ ካብ ፈለማ ብዝኾነ መዐቀኒ ምኽንያታዊ ኣይነበረን ክብል ገሊጹ።

ኤርትራ ኣብ ዝተፈላለዩ ዓውድታት ብልጫታት ከምዘለዋን፡ ኣቐዲሞም ብዝተመስረቱ ሕጋውን ምምሕዳራውን ቅርጺ ተሓጊዛ ንወፍሪ ማዕጾኣ ርሑው ምዃኑን ሓቢሩ።