ኣብ ኒውዮርክ ንልኡኽ ኤርትራ መሪሑ ኣብ መበል 81 ሓፈሻዊ ጉባኤ ሕቡራት ሃገራት ዝሳተፍ ዘሎ ሚኒስተር ጉዳያት ወጻኢ ኤርትራ ኣቶ ዑስማን ሳልሕ፡ ብሓሙስ 24 መስከረም ኣብ ዋና ቤት ጽሕፈት ሕቡራት ሃገራት፡ ብሰንኪ ምውሳኽ ጽፍሒ ባሕሪ ዘጋጥም ሓደጋ ህላወ ሃገራት ኣብ ዝምልከት ላዕለዋይ ደረጃ ዘለዎ ኣኼባ መደረ ኣስሚዑ።

ኣብቲ መደርኡ፡ ንጎረቤት ሃገር ኢትዮጵያ ስማ ከይጠቀሰ ንጹር መልእኽቲ ከምዘመሓላለፈ ተገሊጹ።

ኤርትራ ኣንጻር ጽልዋታት ምውሳኽ ጽፍሒ ባሕሪ መከላኸልን ዕቃበን ስጉምትታት ኣቐሚጣ ከምዘላ ዝገለጸ ሚኒስተር ዑስማን፡ ርጉእን ውሑስን ናይ ባሕሪ ቀጠናታት ከምኡ'ውን ልኡላዊ መሰላት ሃገራት ገማግም ባሕሪ ኣብ ልዕሊ ሕጋዊ ማያተን ከምዘድሊ ኣስሚሩሉ።

ኣብ መወዳእታ ድማ፡ ሃገራት ገማግም ባሕሪ ዘላቕን ርጉእን ስነ-ህይወት ባሕሪ ኣብ ምውሓስን ምድንፋዕን ኣገዳስን መተካእታ ዘይብሉን ተራ ከምዘለወን መብርሂ ሂቡ።