ሚኒስተር ጉዳያት ወጻኢ ኣቶ ዑስማን ሳልሕ ንልኡኽ ኤርትራ መሪሑ ኣብ መበል 81 ሓፈሻዊ ጉባኤ ሕቡራት ሃገራት ኣብ ዝሳተፈሉ ዘሎ እዋን፣ ሮቡዕ 23 መስከረም ምስ ዋና ጸሓፊ ሕቡራት ሃገራት ኣንቶንዮ ጉተረዝ ተራኺቡ፣ ኣብ ኣገደስቲ ዞባውን ዓለማውን ጉዳያት ሰፊሕ ዘተ ኣካዪዱ።

ሚኒስተር ዑስማን፣ እቲ ውድብ ምስ ኤርትራ ዘለዎ ሃናጺ ጽምዶ ንዝገብሮ ኣበርክቶ ኣመልኪቱ፣ ኣድናቆት መንግስቲ ኤርትራ ኣመሓላሊፍሉ።

ልኡላዊ ማዕርነት፡ ግዝኣታዊ ሓድነት፡ ፖለቲካዊ ናጽነት፡ ኢድ ምትእትታው ዘይምግባርን ሰላማዊ ምፍታሕ ዘይምርድዳእን መሰረታውያን ኣዕኑድ ቻርተር ሕቡራት ሃገራት ምዃኖም ድሕሪ ምጥቃስ፣ መርገጺ ኤርትራ ኣብ ጉዳይ ሓድነትን ርግኣትን ሱዳን ነቲ ዋና ጸሓፊ ኣነጺሩሉ።

ኣብ ጉዳይ ድሕንነት ቀይሕ ባሕርን ባብኤልመንደብን ተፈጢሩ ዘሎ ኩነታት ኣመልኪቱ ድማ፣ ልኡላውነትን ሕጋዊ ረብሓታትን ናይተን ኣብ ገማግም ቀይሕ ባሕሪ ዝርከባ ሃገራት ዘኽብር፣ ኤርትራ ንውሑስ ጉዕዞ ባሕርን ኣህጉራዊ ምትሕብባርን እትገብሮ ደገፍ ኣስሚሩሉ።

እቲ ርክብ፣ ብመሰረታዊ መትከላት ቻርተር ሕቡራት ሃገራትን ኣህጉራዊ ሕግን ዝጥሕስ ናይ ምትኹታኽ ተግባራት ሰልፊ ብልጽግና ኣብ ልዕሊ ጎረባብቱ ዝምልከት ኣገዳሲ ዝርርብ'ውን ሓቚፉ።

ኤርትራ፣ ሓንቲ ካብ ምክትል ፕረዚደንት መበል 81 ኣኼባ ሓፈሻዊ ባይቶ ሕቡራት ሃገራት ኮይና ተመሪጻ ኣላ። በዚ መሰረት፣ ቀዋሚት ወኪል መንግስቲ ኤርትራ ኣብ ሕቡራት ሃገራት ኣምባሳደር ሶፊያ ተስፋማርያም፣ ነቲ ብ8 መስከረም ዝተገብረ መኽፈቲ ኣኼባ መሪሓቶ።

ሚኒስተር ዑስማን፣ ጎኒ ጎኒ እቲ ዓመታዊ ኣኼባ ዲፕሎማስያዊ ንጥፈታት የካይድ ከምዘሎ ተገሊጹ። ምስ ሚኒስተር ጉዳያት ወጻኢ ሽወደን ማርያ ኤም ስቴነርጋርድ ኣብ ዝገበሮ ርክብ፣ ኣብ ክልተኣዊ ጉዳያትን ናይ ሓባር ስክፍታ ዘለዎም ዞባውን ዓለማውን ጉዳያትን ኣገዳሲ ዘተ ኣካዪዶም።