ኣብ ምምሕዳር ከተማ ኣዲስ ኣበባ ሓላፊ ቤት ጽሕፈት ጽባቐ ከተማን ሓምላይ ልምዓትን ዝኾነ ፖለቲከኛ ኣቶ ግርማ ሰይፉ፡ ኢትዮጵያ ክትኣትዎ እትግደድ ኲናት እንተተላዒሉ ንካርታ ኤርትራ ብወሳኒ መንገዲ ዝቕይር ክኸውን ኣለዎ ክብል ምግላጹ ጸብጻባት እታ ሃገር ሓቢረን።

እቲ ፖለቲከኛ ኣብ መግለጺኡ፡ ህወሓት ብኤርትራ ዝምራሕ ሓይልታት ኣብ ትግራይ ክህልዉ እንተፈቒዱ ከቢድ ሳዕቤን ዘለዎ ታሪኻዊ ጌጋ ምዃኑ ክዝንጋዕ የብሉን ኢሉ።

ኢትዮጵያ ምስዚ ዝመጣጠን መልሲ ካብ ምሃብ ሓሊፋ፡ ታሪኻዊ ጌጋታት ንምእራም ስጉምትታት ብምውሳድ ንነዊሕ እዋን ዘስዕቦ ስግኣት ጸጥታ ከተወግድ ከምዘለዋ ኣተሓሳሲቡ።

ብተወሳኺ ሓይሊ ባሕሪ ኢትዮጵያ ምስዚ ዕላማ ዝመጣጠን ምድላዋት ክገብር ከምዘለዎ ብምጥቃስ፡ እቲ ስጉምቲ ነቲ ዞባን ዓለምን ዝጠቅም ሰላምን ቁጠባዊ ሽርክነትን ዝፈጥር ምዃኑ ገሊጹ።

ሓደ መንግስቲ ሓቀኛ ዓቕሙ ዝፍለጥ ኣብ ግዜ ሰላም ግብሪ ናይ ምእካብ ዓቕሙ ጥራይ ዘይኮነ፡ ከምዚኦም ዝበሉ በዳሂ ኩነታት ንረብሓ ሃገር ብዓወት ብምስጋር'ዩ ክብል ንሰልፊ ብልጽግና ጻውዒት ኣቕሪቡ።