ቀዳማይ ሚኒስተር ኣቢ ኣሕመድ ንፕረዚደንት ሶማል ኣብ ኣዲስ ኣበባ ተቐቢሉ

ቀዳማይ ሚኒስተር ኢትዮጵያ ኣቢ ኣሕመድ፡ ንፕረዚደንት ሶማል ሓሰን ሸኽ መሓሙድ ሎሚ ሶሉስ 29 መስከረም ኣብ ሰዓታት ንግሆ ኣብ ኣዲስ ኣበባ ተቐቢሉ ከምዘዘራረቦ ተገሊጹ።

ቤት ጽሕፈት ፕረዚደንት ሶማል ቪላ ሶማሊያ ኣብ ዘውጽኦ ወግዓዊ መግለጺ፡ እቲ ፕረዚደንት ናይ ሓደ መዓልቲ ናይ ስራሕ ዑደት ከምዝፈጸመ ሓቢሩ።

እቲ መግለጺ፡ ርክብ እቶም መራሕቲ ኣብ መንጎ ክልቲኤን ሃገራት ንነዊሕ እዋን ዝጸንሐ ዝምድና ኣብ ምሕያልን፡ ጸጥታውን ፖለቲካውን ኩነታት እቲ ዞባ ኣብ ምፍታሕን ዘተኮረ ምንባሩ ገሊጹ፡ ተወሳኺ ዝርዝር ግን ኣይሃበን።

ፕረዚደንት ሓሰን ሸኽ መሓሙድ ምስ ቀዳማይ ሚኒስተር ኣቢ ኣብ ዝራኸበሉ ራብዓይ ግዜኡ ኮይኑ፡ እቲ ዑደት ክልቲኦም መራሕቲ ኣብ ውሽጢ ሃገርን ኣብ መላእ እቲ ዞባን ፖለቲካውን ጸጥታውን ጸቕጢ ኣብ ዘጋጥሞም ዘሎ እዋን'ዩ ተኻዪዱ።