ንልኡኽ ኤርትራ መሪሑ ኣብ መበል 81 ሓፈሻዊ ጉባኤ ሕቡራት ሃገራት ዝሳተፍ ዘሎ ሚኒስተር ጉዳያት ወጻኢ ኣቶ ዑስማን ሳልሕ፣ ኣብ ጎኒ ጎኒ እቲ ኣኼባ ኣገደስቲ ዲፕሎማስያዊ ርክባት የካይድ ምህላዉ ተገሊጹ።

ብዓርቢ 25 መስከረም ኣብ ዘካየዶም ንጥፈታት፣ ምስ መዘንኡ ግብጻዊ ዶክተር በድር ዓብደል ዓጢ ኣብ ዝገበሮ ርክብ፣ ኣብ ምድልዳል ክልተኣዊ ርክብ ኤርትራን ግብጽን፣ ከምኡውን ኣብ ዕደና፡ ወደባት፡ መጓዓዝያ ባሕሪ፡ ፋርማሲን ዓሳን ዝርከብዎም ጽላታት ቁጠባዊ ምትሕብባር ንምግባር ተዘራሪቦም።

ክልቲኦም ሚኒስተራት፣ ድሕነትን ምሕደራን ቀይሕ ባሕሪ ናይተን ኣብ ገማግም እቲ ባሕሪ ዝርከባ ሃገራት ጥራይ ምዃኑ ደጊሞም ኣስሚሮምሉ። ግብጺ ንልኡላውነት፡ ሓድነትን መግዛእታዊ ናጽነትን ኤርትራ ምሉእ ደገፋ ደጊማ ኸምዘረጋገጸት ጸብጻብ ልኡኽ ኤርትራ ሓቢሩ።

ምስ ሚኒስተር ጉዳያት ወጻኢ ግሪኽ ጆርጅ ጀራፔትሪቲስ ኣብ ዝገበሮ ዘተ፣ ኣብ ዝሓየለ ክልተኣዊ ምትሕብባርን ኣብ እዋናዊ ምዕባለታት ቀርኒ ኣፍሪቃን ቀይሕ ባሕርን ኣቓልቦ ጌሮም ተዘራሪቦም።

ካብ ሮቡዕ 23 መስከረም ምስ ዋና ጸሓፊ ሕቡራት ሃገራት ኣንቶንዮ ጉተረዝ ዝጀመሮ ሰፊሕ ዲፕሎማስያዊ ዘተ፣ ምስ ሚኒስተር ጉዳያት ወጻኢ ሽወደን ማርያ ኤም ስቴነርጋርድ፡ ኣማኻሪ ሃገራዊ ድሕነት ዓባይ ብሪጣንያ ሚስተር ጆናታን ፓወል፡ ምክትል ዋና ጸሓፊት ጉዳያት ፖለቲካን ህንጸት ሰላምን ሕቡራት ሃገራት ሚስ ሮዝመሪ ዲካርሎ፡ ሚኒስተር ጉዳያት ወጻኢ ኣልጀርያ ኣሕመድ ኣታፍን ሚኒስተር ጉዳያት ወጻኢ ቡርኪናፋሶ ካራሞኮ ጂን ማሪ ትራኦረን ተራኺቡ ሰፊሕ ዘተ ኣካዪዱ።

ምስ ኣልጀርያዊ መዘንኡ ኣብ ዝገበሮ ዘተ፣ ክልቲኦም ሚኒስተራት ልኡላውነትን ግዝኣታዊ ሓድነትን ሃገራት ኣፍሪቃ ንኽኽበር ዘለዎም ተወፋይነት ኣረጋጊጾም፣ ኣብ መላእ ኣፍሪቃ ንዝፍጠር ግጭታት ኣበርክቶ ዝገበሩ ናይ ወጻኢ ምትእትታዋት ድማ ነጺጎም።