ላዕለዎት ወትሃደራውያን ኣዘዝቲ ኢትዮጵያ፣ ናይ ወጻኢ ሓይልታት ንሓድሽ ኪዳን ዕጡቓት ጉጅለታት ይሕግዝዎን የወሃህድዎን ኣለዉ ዝብል ክስን ፈኸራን ዝሓዘሉ መግለጺታት ኣስሚዖም።

ሓላፊ ጠቕላላ ስታፍ ሓይልታት ምክልኻል ኢትዮጵያ ፊልድ ማርሻል ብርሃኑ ጁላ፣ ናይ ወጻኢ ሓይልታት ንኢትዮጵያ ንምርግጋእን ንምድኻምን ኣብ ዝግበር ጻዕሪ፣ ንሓድሽ ዝተመስረተ ሓባራዊ ኪዳን ዕጡቓትን ናይ ፖለቲካ ጉጅለታትን ይሕግዙ ኣለዉ ክብል ከሲሱ።

እቲ ጻዕሪ ንሓደ ቅድሚ ሕጂ ኣብ ግዳማዊ ሓገዝ ዝተመርኮሰ ፕሮጀክት ናብ ሓድሽ መልክዕ ምቕያር እዩ ብምባል፣ ኢትዮጵያ ኣብዚ እዋን ዘጋጥማ ዘሎ ጸጥታዊ ብድሆታት ኣካል ናይቲ ሰፊሕ ስትራተጂ ናይቶም ቀጥታዊ ወተሃደራዊ ወራር ናይ ምክያድ ዓቕሚ ዘይብሎም ተባሂሎም ዝግለጹ ወገናት ምዃኑ ተዛሪቡ።

ኣብ መወዳእታ ድማ፣ ሻዕቢያን ህውሓትን ብዘይ ሱዳንን ግብጽን ከምኡውን ካልኦት ሓይልታትን ትእዛዝ እንተዘይ ሂቦሞም ሓቢሮምውን ዋጋ የብሎምን፤ ተፈላልዮም ከኣ ትርጉም የብሎምን ክብል ፍልይ ዝበለ መግለጺ ከምዝሃበ ጸብጻባት እታ ሃገር ገሊጾም።

ካልእ ካብ ላዕለዎት ኣዘዝቲ እታ ሃገር ዝኾነ ጀነራል ኣበባው ታደሰ ድማ፣ ኣብዚ ሕጂ እዋን ንከላኸል ኣለና፤ ገና መጥቃዕቲ ኣይጀመርናን ዘለና፣ ኣብታ ዝጀመርናላ መዓልቲ ግን ንከተማ መቐለ ማእከል መደበር ገይርና ባንዴራና ኣብ ቀይሕ ባሕሪ ክንተክል ኢና ክብል ፈኸራ ዝሓዘለ መግለጺ ኣውጺኡ።