ተንተንቲ፡ ነቲ ቅልውላው ቀርኒ ኣፍሪቃ ዘጓህሃሩ ኣካላት ሕጂ ከፍትሕዎ ዝፍትኑ መሲሎም ይቐርቡ ኣለዉ ይብሉ

ኣብ መንጎ ኢትዮጵያ፡ ኤርትራን ግብጽን ንኣዋርሕ ክዓቢ ዝጸንሐ ወጥሪ፡ ኣብዚ ሕጂ እዋን ናብ ዲፕሎማስያዊ ምቑራጽ ምብጽሑ ትጽቢት ዘይተገብረሉ ጌርካ ክርአ ከምዘይብሉ ተንተንቲ ፖለቲካ ይገልጹ።

ኣብ ጉዳያት ቀርኒ ኣፍሪቃ ዝሰርሕ ቱርካዊ ተንታኒ ኡመት ካግሪ፡ ብዓርቢ ኣብ መርበብ ሓበሬታ ኤክስ ኣብ ዘስፈሮ ሓጺር ጽሑፍ፡ ብዙሓት ሰባት ነዚ ቅልውላው ናይ ኣመሪካ ኣማኻሪ ክፈትሖ ትጽቢት ክገብሩ ምዃኖም ጠቒሱ፡ ናይ ቅድሚ ሕዚ ዲፕሎማስያዊ ጻዕርታት ግን ነገራት ከምዘጋደዱ ገሊጹ።

እቲ ተንታኒ ወሲኹ፡ ኢትዮጵያ ንጎረባብታ ኣብ ተፈራርሓሉ ዝነበረት እዋን ሕብረት ኤውሮጳ ገንዘባዊ ሓገዝ ክትህብ ምጽንሓን፡ ኢማራት ዓረብ ኣብቲ ዞባ እትገብሮ ምትእትታው ዝቃወም ኣካል ዘይምንባሩን ወቒሱ።

እዚ ኣረኣእያ ናይቲ ተንታኒ ምዃኑን ናትና ቲቪ ነቲ ዝቐረበ ክሲ ብገዛእ ርእሱ ከረጋግጾ ከምዘይከኣለን ነንብብ። ዝምልከቶም ኣካላት ክሳብ ሕጂ ዝሃብዎ መልሲ የለን።