መንግስቲ ፌደራል ኢትዮጵያ ንባንክታት ኣብ ክልል ትግራይ ዝተኸፍቱ ኩሎም ናይ ባንኪ ሕሳባት ክዓጽዉ ተሪር ትእዛዝ ከምዝሃበ ዝገልጽ ጸብጻባት እታ ሃገር ስዒቡ፡ ፖለቲከኛ ጃውሃር መሓመድ እቲ ስጉምቲ ሓባራዊ መቕጻዕቲ ምዃኑ ኣጠንቂቑ።

ኣብ ማሕበራዊ ሚድያ ገጹ ኣብ ዘርገሖ መልእኽቲ፡ እቲ ሓበሬታ ቅኑዕ እንተኾይኑ እቲ ውሳነ ንፍሉይ ዕላማታት ድሕንነት ወይ ፋይናንሳዊ ዕላማ ዝዓለመ ዘይኮነስ፡ ብቐጥታ ንሚልዮናት ንጹሃት ዜጋታት ዕላማ ዝገበረ ከቢድ ቁጠባዊ መቕጻዕቲ'ዩ ክብል ነቒፉ።

ኣብ ክልል ትግራይ ዝርከቡ ተራ ዜጋታት፡ ኣብቲ ክልል ናይ ባንኪ ሕሳብ ስለዘለዎም ጥራይ ወርሓዊ ደሞዞም፡ ዘውህለልዎ ገንዘቦም፡ ካብ ወጻኢ ዝለኣኸሎም ሓዋላን ንግዳዊ ኣታዊኦምን ከይረኽቡ ምኽልካል ኣዝዩ ዘተሓሳስብ ምዃኑ ገሊጹ።

ህዝቢ ብዘይመረጾ ፖለቲካዊ ግጭት ናይ ቁጠባ ጸገማት ክሽከም ይግደድ ኣሎ ዝበለ ጃውሃር፡ እዚ ስጉምቲ ኣብ ፍርሕን ዘይምርግጋእን ንዝነብራ ዘለዋ ስድራቤታት እቲ ክልል ዕለታዊ ናብርኦም ዝያዳ ከቢድ ከምዝገብሮ ኣረዲኡ።

ቅድሚ ሕጂ ኣብ ዝነበረ ኣዕናዊ ኲናት ትግራይ ነበርቲ እቲ ክልል ተመሳሳሊ ናይ ባንኪ እገዳን ቁጠባዊ ጸቕጥን ተጻዊሮም ከምዝነበሩ ብምጥቃስ፡ ነቲ ታሪኽ ምድጋም ንዘይምትእምማን ህዝቢ ካብ ምዕባይ ሓሊፉ ፖለቲካዊ ወጥሪ ንምህዳእ ዝግበር ጻዕሪ ኣዝዩ ከቢድ ክገብሮ'ዩ ክብል ኣጠንቂቑ።